اسلام آباد ۔ یکم جولائی (اے پی پی) وزیراعظم عمران خان آکھیا جو ملکی معیشت سدھے پاسے ویندی پی اے،سعودی عرب،قطر،یو اے ای اتے چین سمیت دوست ملک ویلھے تے مدد نہ کریندے تاں پاکستان دیوالیہ تھی ویندا،اجوکی حکومت کوں ملک دی تریخ دا ساریاں توں وڈا مالیاتی اتے کرنٹ اکاﺅنٹ خسارہ ورثے اچ ملیے جئیں پاروں ڈالر دے مقابلے اچ روپے تے دباﺅ ودھدا پے جئیں تے قابو پاونڑ سانگے کم کریندے پیوں،ریکارڈ خسارہ چھوڑ کراہیں ونجنڑ آلے ہنڑ ملک کوں غیر مستحکم اتے کمزور کرنڑ دی کوشش کریندے پئن،قیادت دا جیونڑ مرنڑ پاکستان اچ ہوندا تاں ملک اچ اینویں حالات نہ ہوندے،روپے دی قدر گھٹ تھیونڑ اتے ڈالر دی ودھنڑ نال ماضی دے حکمراناں دے اثاثیاں دی قدر ودھدی ویندی اے۔اے گالھیں انہاں سنوار کوں نجی ٹی وی چینل ”اے آر وائی“دے پروگرام اچ پینل انٹرویو اچ گالھ مہاڑ کریندیں ہوئیں آکھی۔وزیراعظم ملک دی معیشت دی صورتحال اتے ڈالر دی قدر ودھنڑ بارے سوالاں دے جواب ڈیندیں ہوئیں آکھیا جو ایں ویلھے ہر پاکستان دی زبان تے معیشت اے،حالات کتھاں ویندے پن،اے حالات کیوں بنڑین،ایں تے ہر پاکستان دی نگاہ اے۔انہاں آکھیا جو اے گالھ سمجھنڑ ضروری اے جو ساکوں کہیں قسم دی معیشت ورثے اچ ملی اے اتے ہنڑ اے کیڑھے پاسے ویندی پی اے،میڈے خیال اچ معیشت سدھے پاسے ویندی پی اے۔انہاں آکھیا جو پاکستان دی اجوکی معیشت بارے ڈو چیزاں سمجھنڑ ضروری ہن،پہلی مالیاتی خسارہ جئیں اچ آمدنڑی اتے خرچے دا تناسب ڈٹھا ویندے اتے ڈوجھا کرنٹ اکاﺅنٹ خسارہ جئیں اچ برآمدات اتے درآمدات اتے ڈالر دی قدر کوں ڈٹھا ویندے ،جئیں بارے دنیا فیصلہ کریندی اے جو ملک دے حالات چنگے ہن یا مندے ۔انہاں آکھیا جو اگر اساں برآمدات گھٹ کریندے پیوں تاں کرنٹ اکاﺅنٹ خسارہ ودھسی اتے ایں تے ساری بین الاقوامی ایجنسیاں ایں تے فیصلہ کریندن جو ایندی حالت چنگی اے یا مندی۔انہاں آکھیا جو پچھلی حکومت 14ارب ڈالر دے کمرشل قرضے گھدن جئیں تے ودھ سود ہئی ،جڈاں اے پیسے کائنا ڈیسوں تاں ملک ڈیفالٹ تھی ویسی۔وزیراعظم آکھیا جو ہنڑ تئیں ڈاہ مہینے اچ10ارب ڈالر دی کمٹمنٹس پوری کر گھدی اے،انہاں آکھیا جو امریکی محکمہ خارجہ دی رپورٹ دے مطابق پاکستان اچ ہر سال گھٹ توں گھٹ ڈاہ ارب ڈالر دا پیسہ منی لانڈرنگ دے ذریعے باہر ویندے ،اساں منی لانڈرنگ تے قابو پا گھندے تاں اے خسارہ نہ ہوندا۔امپورٹ ایکسپورٹ دے فرق اتے منی لانڈرنگ پاروں روپے تے دباﺅ ودھے۔انشاءاللہ تساں ڈیکھسو اے حالات جلدی چنگے تھی ویسن۔انہاں آکھیا جو آندے کجھ ڈینھ اچ آئی ایم ایف نال میٹنگ اے،آئی ایم ایف نال معاہدے تے دستخط تھی گئے تاں حالات چنگے تھی ویسن۔
