اسلام آباد۔15نومبر(اے پی پی) چیف الیکشن کمشنر سکندر سلطان راجہ نگران وزیرِاعلی ٰخیبر پختونخوا جسٹس (ریٹائرڈ) سید ارشد حسین شاہ نال ملاقات اچ ایں امر تے زور ݙتے جو صوبہ اچ موجودہ سکیورٹی دی صورتِ حال کوں سامݨے رکھیندے ہوئیں عام انتخابات دے پر امن انعقاد کیتے ضروری اقدامات کیتے ونڄن جیں اچ ووٹرز دے تحفظ کوں اولین فوقیت ݙتی ونڄے۔ الیکشن کمیشن توں جاری بیان موجب چیف الیکشن کمشنر سکندر سلطان راجہ نال نگران وزیر اعلی کے پی کے الیکشن کمیشن سیکرٹریٹ اسلام آباد اچ ملاقات کیتی۔ نگران وزیرِ اعلی ٰ چیف الیکشن کمشنر کوں صوبے اچ انتخابات دیاں تیاریاں تے بریفنگ ݙتی تے یقین ݙیوائے جو خیبر پختونخوا دی صوبائی حکومت الیکشن کمیشن نال رل تے صوبے اچ آزادانہ، منصفانہ اتے غیر جانبدارانہ انتخابات داانعقاد یقینی بݨیسی۔چیف الیکشن کمشنر نگران وزیرِ اعلی کوں عہدہ سنبھالݨ تے مبارخ ݙتی تے آکھیے جو صوبہ خیبر پختونخوا اچ موجودہ سکیورٹی دی صورتِ حال کوں سامݨے رکھیندے ہوئیں عام انتخابات دے پر امن انعقاد سانڳے ضروری اقدامات کیتے ونڄن ۔ سکندرسلطان راجہ نگران وزیرِ اعلی کوں ݙسائے جو خیبر پختونخوا اچ انتخابات دیاں تیاریاں دا جائزہ گھنݨ سانڳے وختی الیکشن کمیشن صوبے دا دورہ کریسی جیں اچ ساریاں تیاریاں کوں غور نال ݙٹھا ویسی ۔
