نیویارک۔25ستمبر (اے پی پی) وزیراعظم محمد شہباز شریف آوݨ آلی نسلاں کیتے ماحولیاتی بچت کوں یقینی بݨاوݨ تے زور ݙیندیں ہوئیں آکھیا اے جو پاکستان دا کاربن گیساں دے اخراج اچ حصہ نہ ہووݨ دے برابر پر ایں توں ساریاں توں ودھ متاثرہ ملکاں اچ شامل اے، اساݙا ماحولیاتی ایجنڈے تے عمل درآمد دا عزم پکا تے اٹل اے، ملک اچ بدلوی توانائی اتے بُوٹے لاوݨ کوں ودھایا ویندا پئے، 2035ء تئیں انرجی مکس اچ قابلِ تجدید اتے پاݨی دی بجلی دا حصہ ودھا تے 62 فیصد تئیں کیتا ویسی، 2030ء تئیں جوہری توانائی دی صلاحیت اچ 1200 میگاواٹ ودھارا کیتا ویسی، 30 فیصد ٹرانسپورٹ کوں صاف توانائی تے منتقل کیتا ویسی اتے پاݨی دی بچت کوں یقینی بݨایا ویسی، قرضیاں تے قرضے مسئلے دا حل کائنی، عالمی برادری ماحولیاتی بچت کیتے مالی مدد دے وعدے پورے کرے۔ او ٻُدھ کوں نیویارک اچ اقوام متحدہ دے جنرل سیکریٹری اتے برازیل دے صدر ولوں منعقدہ اسپیشل کلائمیٹ ایونٹ توں خطاب کریندے پئے ہن۔ وزیراعظم آکھیا جو او ہک ایجھے ویلھے ڳالھ کریندے پئن جݙاں پاکستان کوں مون سون دے مینھ، کلاؤڈ برسٹ اتے تباہ کن سیلاب دی صورتحال پیش اے، ایں موسمیاتی آفت پاروں 50 لکھ توں ودھ لوک اتے 4100 وستیاں متاثر تھئن جݙاں جو ہک ہزار توں ودھ لوک مِٹ ڳئن، 2022ء اچ وی پاکستان کوں سیلاب توں 30 ارب ڈالر توں ودھ دا نقصان تھیا ہئی اتے لکھاں لوک بے گھر تھئے ہن، اقوام متحدہ دے سیکرٹری جنرل انتونیو گوتریس آپ ایں صورتحال کوں ݙیکھ آئن، وزیراعظم آکھیا جو پاکستان دا عالمی گرین ہاؤس گیساں دے اخراج اچ حصہ نہ ہووݨ دے برابر اے پر اساں آپݨے حصے توں بہوں ودھ نقصان چیندے پئیوں۔ انہاں ایں توقع دا اظہار کیتا جو عالمی برادری آوݨ آلی نسلاں دی بچت کیتے آپݨی ذمہ واریاں پوری کریسی اتے ماحولیاتی بچت کوں یقینی بݨاوݨ کیتے اقدامات کیتے ویسن۔ انہاں ماحولیاتی بچت کیتے پاکستان دے اقدامات کوں اُجاگر کریندیں ہوئیں آکھیا جو پاکستان زہریلی گیساں دے اخراج کوں روکݨ اتے ماحولیاتی بچت کوں یقینی بݨاوݨ کیتے ترجیحی بنیاداں تے اقدامات کریندا پئے، وݙے پیمانے تے بُوٹے لاوݨ اتے جنگل لاتے ویندے پئن، مینگروز دی بچت کوں یقینی بݨایا ویندا پئے، ماحول دوست پاݨی دی بجلی، شمسی اتے نیوکلیئر توانائی کوں ودھایا ویندا پئے۔ وزیراعظم آکھیا جو پاکستان دا ماحولیاتی ایجنڈے تے عمل درآمد دا عزم پکا تے اٹل اے، پاکستان 2030ء تئیں گرین ہاؤس گیساں دے اخراج اچ بغیر کہیں شرط دے 15 فیصد گھٹ دا وعدہ کیتا ہائی۔ مجموعی 50 فیصد گھٹ دے ہدف دے تحت پاکستان پہلے ای آپݨے غیر مشروط 15 فیصد گھٹکی دے وعدے کوں پورا کر ڳھدے ۔ وزیراعظم آکھیا جو پاکستان دے انرجی مکس اچ قابلِ تجدید توانائی دا حصہ ایں ویلھے 32 فیصد توں ودھ اے۔ شمسی توانائی دی پیداوار 2021ء دے بعد ست ڳُݨاں ودھ ڳئی اے۔ انہاں آکھیا جو پاکستان دے نیشنل ایڈاپٹیشن پلان تے عمل درآمد ناکافی عالمی ماحولیاتی مالی مدد پاروں متاثر تھیندا پئے۔ وزیراعظم اعلان کیتا جو 2035ء تئیں ملک دے انرجی مکس اچ قابلِ تجدید اتے پاݨی دی بجلی دا حصہ ودھا تے 62 فیصد تئیں کیتا ویسی، 2030 تئیں جوہری توانائی دی صلاحیت اچ 1200 میگاواٹ ودھارا کیتا ویسی، 2030ء تئیں 30 فیصد ٹرانسپورٹ کوں صاف توانائی تے منتقل کیتا ویسی، ملک بھر اچ 3 ہزار چارجر اسٹیشن قائم کیتے ویسن، کلائمیٹ سمارٹ زراعت کوں ودھایا ویسی، پاݨی دی بچت کوں یقینی بݨایا ویسی اتے ہک ارب بُوٹے لاوݨ دا منصوبہ اڳوں ودھایا ویسی۔ اقوام متحدہ دے سیکرٹری جنرل انتونیو گوتریس آکھیا جو موسمیاتی تبدیلی دے ودھدے ہوئے چیلنج نال نبڑݨ کیتے کلائمیٹ ایکشن دی لوڑھ اے، عالمی درجہ حرارت اچ 1.5 ڈگری گھٹت کیتے تِکھے اقدامات ضروری ہن، موسمیاتی تبدیلیاں توں سماجی اتے اقتصادی چیلنج ودھدے پئن۔ برازیل دے صدر لوئیزانیکیو لولا ڈیسلوا آکھیا جو گرین ہاؤس گیساں دے اخراج دے ذمہ وار ملک صورتحال دے ذمہ وار ہن، متاثرہ ملکاں دی مدد کیتے اقدامات ناکافی ہن، ترقی یافتہ ملکاں ولوں وعدیاں توں مُکرݨ وی ماحولیاتی مسئلیاں دی ہک اہم وجہ اے۔ یورپی کمیشن دی صدر آکھیا جو یورپی یونین گرین توانائی دے شعبے اچ سرمایہ کاری اچ ودھارا کیتے، ماحول دوست ٹیکنالوجی کوں ترجیح ݙیتی ویندی پئی اے، یورپی یونین موسمیاتی تبدیلیاں دے شعبے اچ ساریاں توں ودھ فنڈز ݙیندی پئی اے۔ ترکیہ دے صدر رجب طیب اردوان آکھیا جو ماحولیاتی تبدیلیاں توں دھرتی تے زندگی کوں خطرے پیش ہن۔ کلائمیٹ سمٹ اچ موسمیاتی تبدیلیاں دے ودھدے ہوئے چیلنجز اتے اجتماعی اقدامات نال متعلق تجویزاں تے وچار کیتا ڳیا۔
.jpg)
